Covid-19 : Hmarchhak dinhmun

Arunachal Pradesh-ah hri kai hmuh chhuah mi 67 awm tawhin, an zinga pali chu enkawl dam an ni tawh a, mi 63-te enkawl mek an ni. 

Health department chuan hri kai hmuh thar hi mi paruk an awm thu nimin khan a sawi a, an zinga hian India Army sipai pathum an tel. 

Sipaite hi West Kameng district-a Singchung sub-division a awm an ni a, Bihar aṭanga tunhnaia kir an ni. Anni bakah hian Changlanda district-ah mi pahnih leh Longding-ah mi pakhatin hri an kai tih hmuh a ni bawk. 

Hripui leng vanga inkhar­khipna thlahdul a nih hnuah state danga tangkhang haw hi mi 3,06,420 an tling tawh a, mi 13,479 te RT-PCR test neih sak an ni tawh bawk. 

Assam-a Covid-19 kai hmuh chu mi 3,430 an tling tawh a, an zinga 1,432 chu enkawl dam an ni tawh. 

Ningani khan hri kai hmuh thar hi mi 145 an awm a ni. An zingah hian  Tezpur-a DC office-a thawk pahnih an tel. 

Assam-ah hri kai an pun belh zel avangin  Indian Council of Medical Research (IMCR), New Delhi chuan Karbi Anglong district-a Diphu Medical College and Hospital chu Covid-19 testing laboratory atan a pawmsak a, nimin aṭang khan laboratory-ah test hi kalpui ṭan nghal a ni. He lab-ah hian hill district pathum - Dima Hasao, West Karbi Anglong leh Karbi Anglong-a chengte a huam dawn a ni. 

State dang aṭanga haw mi 24 chu Ningani khan Covid-19 an kai tih hmuh chhuah a ni a, Manipur-a hri kai hmuh hi mi 366 an awm tawh.

Hetih lai hian hri kai zinga mi 10 chu enkawl dam leh niin Ningani khan damdawiin aṭangin chhuah tir an ni a, inah ni 14 chhung inkhung hrang chhunzawm tura tih an ni. Enkawl dam hi mi 74 an awm tling tawh a ni. 

Ningani thleng khan sample 20,528 test a ni tawh.

Nimin zinga sample test result chhuakah Nagaland-ah Covid-19 kai mi 26 hmuh chhuah belh a ni a, nikhatah hri kai hmuh chhuah tam ber ni a ni. Hri kai hmuh tawh hi 156 an tling tawh a ni. 

Covid-19 kai zingah thihpui an awm lo a, enkawl dam 30 an awm tawh thung. 

Hri kai hmuh chhuah thar zinga 23 chu Dimapur quarantine centre-a awm an ni a, pahnih chu Kohima quarantine centre-ami niin, Peren centre-a awm pakhat a tel bawk. 

Chief minister Conrad Sangma chuan hri leng chungchangah social media lamah thu dik lo thehdarh a awm ṭhin chu pawi a tih thu sawiin, heng mite laka action na taka la turin official-te a hriattir nghal bawk. Social media-ah hian Chief Minister Office leh National Informatics Centre-a thawk zingah Covid-19 kai an awm nia thu thehdarh a ni a, mahse hei hi thu dik lo a nih thu CM chuan sawiin, mipuite pawh thu belhchian dawl lo thehdarh lo turin a ngen nghal a ni. 

Sikkim-ah ni khatah hri kai hmuh chhuah tam ber ni thlengin, Mumbai leh West Bengal aṭanga haw mi 14-ten Covid-19 an kai tih hmuh a ni. An zingah hian naupang kum 2 mi pawh a tel. Sikkim-ah hian hri kai enkawl mek mi 24 an awm ta a ni.

 

Hri kai hmuh thar zinga pakuate hi qurantine centre pathuma awm laite an ni a, an test result hriat hnuah heng centre pathumte hi containment centre-ah puan zui nghal a ni tih state health director general Dr Pempa Tshering Bhutia chuan a sawi.

Tripura-ah Covid-19 kai hmuh chhuah belh mi 18 an awm a, anni nen hri kai hmuh tawh hi mi 916 an tling tawh a ni. 

Chief minister Biplab Kumar Deb chuan hri kai sample 1,430 endik zingah 18 chuan hri an kai tih hmuh chhuah a nih thu Ningani zan khan a sawi a, an vai hian zin chhuahna nei vek an ni. 

Ningani vek han  hri kai enkawl mek zinga 39 chu an result a negative tawh avangin Covid-19 Care Centre aṭangin chhuah tir an ni. Hri kai enkawl dam hi mi 278 an awm tawh. 

Meghalaya-a Covid-19 kai enkawl mek zinga mi panga chu an test a negative tawh a, hri kai enkawl dam hi mi 18 tling tawhin, enkawl mek mi 25 an awm. 

Chief minister Conrad Sangma chuan mi panga te enkawl dam an nih leh tak avangin stat recovery rate chu 40.9% a nih thu a sawi. 

State dang aṭanga haw zinga hri kai hmuh chhuah belh zel a nih avangin sorkar chuan kaihhruaina khauh takin a kalpui mek. Hmun dang aṭanga hawte chu test neih sak vek an nih hnuah, an result a negative chuan inah emaw, community centre-ah emaw ni 14 chhung khung hran tura dah an ni.