Assam-a oil khur kan dan chhui chiang tur high-level committee din

Petroleum ministry leh Assam state sorkar chuan Assam-a Baghjan oil khur-a kangmei chhuah dan chhui chiangtu tur high-level committee an din. 

Union Ministry of Petroleum and Natural Gas-in a din high level committee hi Director General of Hydrocarbons SCL Das-a'n a ho dawn ONGC chairman hlui  BC Bora leh ONGC director hlui TK Sengupta-te chu member atan ruat an ni. 

Member pathum an awmna committee hian chhiatna thlen dan te chhui chiangin, hetiang chhiatna a thlen nawn tawh lohna tura hma lak dan tur rawtna te a siam dawn bawk. Thla khat chhungin report thehlut hman tura tih a ni. 

Assam chief minister Sarbananda Sonowal pawhin Additional Chief Secretary kaihhruai high-level inquiry nei turin thupek a tichhuak tawh bawk a, ni 15 chhungin report an thehlut ang. CM chuan additional principal conservator of forest (wildlife) MK Yadava chu oil khur kangin a chhehvel biala nghawng a neih pawi theih dan turte zirchiang turin a hrilh bawk. 

Tinsukia district-a Oil India Ltd ta, oil khur pakhatah May 27 aṭang khan oil hi a put a, June 9 khan kangmei nasa tak a chhuak zui ta a ni. Kangmei chhuakah hian kangṭhelhtu pahnih an thih bakah, mi dang paliin hliam an tuar a ni. 

Kangmei chhuak hian chenna in 35 a tichhia a, oil field awmna chhehvel biala mi 7,000 chuang chu hmun him lamah sawnchhuah an ni.