Assam leh Meghalaya Chief Minister-ten December-ah ramri buaina chinfel hman an tum

Assam chief minister Himanta Biswa Sarma leh Meghalaya chief minister Conrad K Sangma-te chuan Thawhlehni khan state pahnihte ramri buaina an neihna zinga mi, Kamrup district-a Langpih an tlawh.

Chief Minister-te hi Guwahati aṭangin helicopter-in Langpih hi an pan a, ramri an tlawh hnuah Guwahati-ah joint conference an nei leh a ni. He hunah hian state pahniha regional committee an din chairman-te pawh telin, Assam cabinet minister Atul Bora leh Meghalaya cabinet minister Renikton Lyngdoh Tongkhar-ten an ṭawiawm bawk. Anni bakah state pahnih chief secretary ve ve leh senior official-te pawh an kal bawk a ni.

Himanta Biswa Sarma leh Conrad Sangma-te chuan state pahnih sorkarin ramri buaina an neihna chungchang buaipui tura an din, regional committee-te chuan buaina chinfel dan tur an ngaihtuahnaah hma an sawn zel tih an sawi.

Committee-te hian buaina an neihna hmunte pawh an tlawh kim tawh tih a sawi bawk. November 30-ah report an thehluh hman an beisei thu sawiin, "Heng report-te hi state sorkar pahnihah thehlut ve ve a nih hnuah stakeholder-te inbiakna neihpui an ni leh ang, hemi hnu hian buaina chinfel dan kawng chu inhawng tawhin, December 30-ah final statement pawh kan tichhuak thei tawh dawn a ni," tiin an sawi.

Assam CM chuan state pahnihte inrina hmun 12-a hmun parukah buaina an neih thu leh, heng hmuna an buaina chinfel dan ngaihtuah tura committee pathum ve ve an din thu a sawi.

Meghalaya CM pawhin ramri an tlawh chuan state pahnihten ramri buaina chinfel an duh zia a tilang tih sawiin, hun rei tak ramri hrula cheng mipuite harsatna an lo tawhte chu chinfel ngei an tum tih a sawi. Ramri buaina chinfel chu thil awlsam tak ni lo mah se, Assam leh Meghalaya-a rorellai sorkar chuan huaisen takin buaina chinfelna turin hma an la a ni, a ti. Sorkar hmasa lamte khan politics lam an dinhmun a nghawng an hlauh avangin hma an la ngam lo niin a sawi bawk.

Himanta Biswa Sarma chuan state pahnihte chuan ramri hrula chengte tana hmasawnna hna thawhna turin sorkar laipui scheme siamte pawh kalpui an remti ve ve tih a sawi.

State pahnihten ramri chungchanga buaina an neihte hi sorkar laipui pawhin chinfel tumin kawng hrang hrangin hma a lo la tawh a, mahse a hlawhtling thei lo a ni.

Assam leh Meghalaya CM-te hian inbiakna hmanga ramri buaina chinfel dan ngaihtuahin kumin July 23 khan a ṭum khatna atan meeting an nei a, August 6 khan meeting vawi hnihna an nei leh bawk.