Guwahati-ah ESIC Model Hospital siamna tur hawng

Union minister of state for labour and employment Rameswar Teli chuan Thawhlehni khan Guwahati-a Beltola area-ah khum 200 awmna Employees’ State Insurance Corporation (ESIC) Model Hospital siamna tur a hawng.

ESIC Model Hospital sak hna ṭanna tur a hawnnaah Teli chuan ministry of labour and employment chuan cheng vaibelchhe 143 senga he hospital sak rawtna hi a pawm tih a sawi. "Hei hi hmarchhak bial puma ESIC enkawl model hospital awmchhun a ni a, Assam-a insured person-te tan bakah, hmarchak state dang amite pawhin an chhawr ṭangkai thei dawn a ni," a ti.

Teli chuan Tinsukia-a ESI Hospital chu ESIC kuta hlan rawt a nih thu leh, he rawtna hi Assam sorkar pawhin a pawm tawh thu a sawi bawk. Prime minister Narendra Modi kaihhruai sorkar laipui chuan Assam-a district paruk - Kokrajhar, Baksa, Hojai, Charaideo, Dima Hasao leh Hailankandi-ahte tun hnaiah ESIC scheme a kalpui belh leh thu a sawi bawk a ni. Hengte nen hian district 30-ah ESI scheme hi kalpui a ni tawh tih a sawi.