Nagaland Assam Rifle Ambush NSCN(K) in mawhphurtuah inchhal

Assam Rifles official-te chuan nimin khan Nagaland-a Mon district-ah lambun an nih thu sawiin sipai pahnihin nunna an chan thu leh pali in hliam an tawrh thu an sawi.

Assam Rifles public re­lations officer to the Inspec­tor General chuan Pathianni tlai dar 3 velah khan hel pawl ni ngeia hriat ten Assam Rifle-te chu Aboi bulah an lo lambun thu a sawi a ni.

Hetih lai hian National Socialist Council of Naga­land-Khaplang (NSCN-K) te chuan thuchhuah siam ve nghalin mawhphurtu niin an inchhal. NSCN-K “deputy kilonser” (deputy minister) “col” Isak Sumi chuan inbeihnaah hian mi paruk an thah thu leh midang paruk velin hliam an tawrh thu a sawi ve thung.

He inbeihna hi an ram chhunga dan loa India sipai dah an nih do­dalna “Summer Offensives” kal zela an hmalakna a nih thu a sawi a, Naga rama remna leh muanna awm theih loh chhanah a puh bawk.

“Summer Offensives” beihpui an thlak mekah chuan India sipai te an ram chhunga dan loa an awm leh an duh ang anga hma an la chu an ngaihtheih loh thu leh thenfai hna an kalpui mek thu a sawi a, Naga sipai-te chuan India sipai patrol lai chu an lo lambun tih sawiin mi paruk vel tal chu an thah thu leh midang paruk vel chu an hliam tih a sawi.

Sumi chuan a hmaa beih­pui an thlak ṭum pawhin Shengha Lampong-ah India sipai pahnih an thah thu sawiin unit Commander an thah bakah Major pakhat pawh an kahhliam thu a sawi bawk. Mahse India sipai te chauh an tum thu sawiin tualchhung mite erawh chu tihnat an ni lo tih a sawi bawk a ni.