Meghalaya-in education sector-ah Rs vbc 2,000 a hmang

Meghalaya chief minister Conrad Sangma chuan state sorkarin education sector tichangtlunna turin kum khatah cheng vaibelchhe 2,000 vel a hmang ṭhin niin a sawi.

Nilainia North Garo Hills district-a Mendipathar College golden jubilee lawmna a hmanpuinaah Chief Minister chuan he thu hi sawiin, sorkar sum a senna tam ber zingah education sector chu a tel tih a sawi a ni.

"Kumin bik pawh Government Lower Primary School 200 vel infrastructure tihṭhatna turin cheng vaibelchhe 100 kan pe chhuak tawh a ni," a ti. State sorkarin education sector a ngaih pawimawh thu sawiin, CM Sangma chuan school thuam ṭhat tur dang 300 pawh thuneituten an thlang tawh a, hemi atan hian fund pawh buaipui mek a ni, a ti. Sangma chuan sorkar chuan tun hnaiah state chhunga college pakuaah “People’s College” scheme kalpuiin, programme hrang hrangte kalpui a nih thu a sawi.

Mendinpathar College-a hun hmanah hian education minister Lahkmen Rymbui, deputy speaker Timothy D Shira leh official dang eng emaw zat an tel bawk.

Chief Minister chuan, "Kum 2018 inthlan neih dawn khan state mipuite hnenah hun min pe a nih chuan education siamṭhatna turin kan thawk dawn tiin ka lo tiam tawh a ni. Kan tiam ang ngeiin thuneihna an chan veleh State Education Policy an siam a, education sector mamawhte tipuitling turin theihtawp kan chhuah zui a ni," a ti.

Zirlai pung zel leh higher school-a admission tih a harsat ṭhin chungchang pawh sawiin, Sangma chuan sorkar pawhin hei hi a hriatpui a, zirna sang zawk zir chhunzawm duhten harsatna an tawh lohna turin seat tam zawk siam belh a, college-te pawh din belh dan kawng a ngaihtuah mek tih a sawi.