Nagaland-ah Export Facilitation Centre hmasa ber hawng

Nagaland chief minister Neiphiu Rio chuan Kohima-ah Indian Institute of Foreign Trade (IIFT) hnuaia Export Facilitation Centre (EFC) din thar a hawng. EFC hi an state-a a hmasa ber niin, tualchhunga sumdawngte state pawn lama an inphochhuahna kawngah a pui dawn a ni.

EFC hi Investment and Development Authority of Nagaland (IDAN) building-ah siam a ni.

Chief Minister chuan sumdawngte chu he centre hi hmang ṭangkai thiam tura chahin, Naga mipuite chu economy lam aiin politics lam an buaipui zawk a, he facility hian an khawhawi pawh a thlak danglam a beisei thu a sawi. Leilung hausakna haichhuah tur tam tak an neihte chu haichhuah loha a awm avangin state rethei takin an awm reng a ni, a ti. Kum 1994 aṭang khan Naga political issue avangin natural gas leh tuialhthei zawnchhuah hna thawh pawh tawpsan a ni, a ti bawk.

Covid-19 hripui leng chuan intodelh pawimawh zia a rawn hriatchhuah tir thu sawiin, Rio chuan loneitute pawhin hlawk zawka thlai an tharchhuah theih dan kawng zawnpuiin hma a la tih a sawi.

EFC chu bul an ṭanna tur a nih a beisei thu sawiin, CM chuan Naga entrepreneur leh ṭhalaite chu an tumah chiang tur leh, mawhphurhna la ngam turin a chah. An tuma chiang, hmalakna tur ṭha tak neite chu sorkar chuan a theih angin hma a lakpui zel dawn tih a sawi bawk.