Tripura Police-ten Twitter-a BJP sorkar sawiseltute bitum leh

Tripura Police-te chuan state chhunga buaina chhuak chungchang an post avanga civil society member eng emaw zat leh lawyer ṭhenkhatte chu dan khirh tak, Unlawful Activities (Prevention) Act leh Indian Penal Code hnuaia thubuai an siamsak hnuah, twitter lama BJP sorkar leh BJP hruaitute sawiseltu an bitum leh.

Police-te hian Twitter hnenah twitter handle 68 block tura an ngen bakah, a hmangtute nihna kimchang an zawt mek. Tweet 57 chu paihsak tawhin, profile 24 chu tihtawp an ni tawh. Block tura an ngen zingah hian follower 10,000 chuang nei 12 an awm.

Heng handle tam zawkte hian BJP sorkar, hruaitute leh party kalphung an sawisel a, an zingah hian journalist tia inziak mi pakua awmin, political worker pasarih bakah sakhaw pawl nena inzawm nia insawi pasarih an awm bawk.

Hetih lai hian Nilaini khan Supreme Court chuan UAPA hnuaia thubuai an siamsak, lawyer pahnih leh journalist pakhat te lakah action la lo turin Tripura police-te a hriattir. Police-ten UAPA an hman chungchangah hian advocate Mukesh leh Ansarul, journalist Syam Meera Singh-te chuan Supreme Court-ah petition an thehlut a, hei hi chief justice of India NV Ramana, justice DY Chandrachud leh Syraa Kant awmna bench chuan a ngaihtuah a ni.

Bangladesh-a Hindu-te beih an nih chungchang duh lohna lantira, Hindu Vishwa Parishad(VHP)-ten Tripura-a rally an huaihawtnaah buaina chhuakin, Muslim mite beih tel an ni a, in hal sak leh tharum thawhnate a thleng a ni.