Manipur University VC in nawrh titawp turin ngen

Manipur University vice-chancellor Adya Prasad Pandey chuan zirlai nuar mek te chu an nawrh titawp turin a ngen.

Prasad Pandey chuan stakeholder-te pawh hemi kawnga thlawp tur hian a ngen nghal bawk.

All Manipur Students’ Union chuan vice-chancellor thar ngiatin June 6 aṭang khan nawrh an huaihawt tawh a ni. Hemi a nih avang hian University chhunga boruak a pangngai leh theih nan Pandey chuan zirlaite chu an nawrh titawp turin a ngen.

Zirlai pawlte hian administrative block-te kharin class te an boycott bawk a, exam te pawh an boycott bawk. Hei vang hian governor mai bakah central sorkar beng pawh a thleng hial a ni.

Manipur University Teachers’ Association pawhin VC chu zirlaiten an puhnaah hian insawiafiah turin an phut thu an sawi ve bawk a, VC in zirlaite chhanna mumal a pel loh avang hian Dean paruk lai chuan banna an thehlut tawh nghe nghe.

Teachers’ Association chuan VC chu he thilah hian a ngawih reng avangin an dem thu an lo sawi tawh bawk.

Vice-chancellor Adya Prasad Pandey chuan Pathianni khan inbiakna nei tura a inhawng reng thu a sawi a, zirlai emaw zirtirtu emaw pawh thil sawipui duh an awm a nih chuan a inhawng reng tih a sawi.

Zirlaiten an puhna pawh chhangletin, Pandey chuan khua a chhuahsan fo tih chu a pawm thu a sawi a, mahse official duty chiahin a chhuak ṭhin niin a sawi. A zin veivahna atana cheng vaibelchhe riat vel a hmang nia an puhna chu chhanglet in a zinna a sum hman chuan vaibelchhe riat chu a hnaih lo hle tih a sawi bawk.

Bullet-proof car leina tur atana cheng nuai 60 a hmang nia an puhnaah pawh insawifiahin a Toyota Fortuner SUV chu bullet-proof version khawih danglam a nih thu a sawi a, miin an tihbuai ṭhin avangin pek a nih thu a sawi.

Department zawng zawngah smart class pakhat ṭheuh dah a nih dawn thu sawi nghalin, ITI hnenah contract pek a nih thu a sawi. He project atan hian cheng vaibelchhe 1.9 sen a nih tawh thu a sawi a ni.

Pandey chuan smart class 31 siam a nih dawn thu sawiin hemi atan hian cheng vaibelchhe 4 ruahman a nih thu a sawi bawk.

Regular post, registrar leh comptroller of examination post siam duh loa puhna pawh chhang letin heng post hi chu President-in a remtihpui hma chu a siam theih loh tih a sawi a ni.