Meghalaya CM-in state logo tlangzarh

Meghalaya chief minister Conrad K Sangma chuan Ningania Tura bul, Babadam-a Me'gong Festival a hawnnaah, Meghalaya-in state a nih champha kum 50-na, golden jubilee lawmna tura state logo tur a tlangzarh nghal.

Garo culture leh nunphung pholanna Me'gong Festival hi ni thum awh tur a ni a, kuminah hian Meghalaya bakah Arunachal Pradesh, Sikkim leh Assam aṭangin tradition drink an pho chhuak a, hengte hi buh leh thei aṭanga siamte an ni. Food show-te buatsaih ni bawkin, hmarchhak state hrang hrang aṭanga kalten hnam lamte an entir bawk.

Chief Minister chuan he festival hi state golden jubilee lawmna peng pakhat a ni tel tih a sawi. State golden jubilee lawmna pual hian state chhungah festival hrang hrang buatsaih a ni dawn a, nakkum January 21-ah a lawmna pui ber chu state khawpui Shillong-ah neih niin, hemi ni vek hian khawpui hrang hrangah pawh lawm a ni ang.

Tourism department chuan Me'gon Festival chu Garo Hills-a tourism chawilarna atan an hmang nghal tih sawiin, Sangma chuan Covid hri leng chu tourism industry-in a tuar na hle tih a sawi a, mahse hri lengin ziaawm lam a pan zel tawh avangin sorkar pawhin khualzin tam zawk hipna tur leh tourism chawilarna turin kawng hrang hrangin hma a la chho mek a ni, a ti.

Festival hi MLA Thoman A Sangma, Marcuise Marak bakah Sweden embassy-a deputy head of mission Gautam Bhattachrya-ten an hmanpui bawk a ni.