AP-a zirlai awm lohna school 400 khar tawh

Arunachal Pradesh sorkar chuan state chhunga education system siamṭhatna tura hma a lakna kal zelah, zirlai awm lohna sorkar school 400 a khar tir tawh.

Chief minister Pema Khandu chuan India ramin zalenna a hmuh tirh khan an state-ah sorkar school pathum chauh a la awm a, tunah erawh chuan 3,000 chuang an awm tawh tih sawiin, hemi rual hian zirna lama quality erawh an beisei angin a la ṭha lo tih a sawi.

Khandu chuan, "State chhung hmun hrang hrangah sorkar school, zirlai nei lo 400 vel kan khar tawh a, assembly constituecy tinah model school atana siam turin school pakhat ṭheuh thlan an ni tawh bawk a ni," a ti.

Chief Minister chuan tualchhunga pawl hrang hrangte chu an bial chhung tlawh a, khawi school nge khar ngai tih leh, eng school-te nge chhunfin ngai tihte enfiah turin a sawm nghal bawk. "School ṭhenkhat, inhnaih te tea awmte chu chhunfin a, hma an sawn zawk theihna tura infrastructure ṭha tak nen, zirtirtu indaih tawk taka an awm theihna tura siam an ngai a ni," tiin a sawi.

State chhunga sorkar college 19-ah thawktu indaih tawk loh leh infrastructure a ṭha tawk lo tih pawh sorkar chuan a hriatpui thu sawiin, education commissioner hnenah pawh December thlaa cabinet meeting-a ngaihtuah turin thawktu lak belh ngai chungchangte pawh thlen turin a hrilh bawk.