Manipur : Imphal West-ah thla 2 atan CrPC Section 144 puang

Manipur-a Imphal West district-ah buaina a chhuah palh venthawn thilah Ningani zan aṭang khan thla hnih chhung atan punkhawm khapna, CrPC Section 144 puan a ni.

District magistrate Th Kirankumar chuan district chhunga dan kalha chetnate a thlen fo avangin khuahkhirhna dan hi puan a ni tih a sawi.

Ningani zing khan Imphal West district-a Koirengei-a dawr pakhat kawtah bomb a puak a, mahse vanneih thlak takin he pawikhawihna thlengah hian hliam an awm lo. Mahse pawikhawihna dang leh, boruak muanawm tichhe zawnga thil a thlen leh venthawn thilah thuneitute chuan pungkhawm khapna hi an puang nghal a ni.

Section 144 puan chhung hian mi panga aia tam punkhawm khap a ni a, hei bakah midang beihna atana hman theih tiang, lung, leh puak thei thilte chu ken khap tlat a ni bawk. Mahse he khapna hian sorkar agency, dan leh thupek kengkawhtute leh essential service enkawltute chu a huam lo ang.

Hemi chhunga sakhua, pawl, khawtlang leh intihhlimna thila punkhawmna, mi panga aia tam telna tur buatsaih turte chuan district magistrate aṭangin phalna an lak hmasak a ngai dawn a ni.