Sikkim-ah prepaid electricity meter hmang dawn

Sikkim sorkar chuan state chhunga khawpui hrang hrangah prepaid electricity meter hman a tum a, mahse hengte hi a tahtawla vuah a ni dawn tih state power minister PMN Sherpa chuan a sawi.

Sorkar laipuiin Integrated Power Development Scheme a siam bawhzuiin, state sorkar hian kumin December thla aṭangin khawpui hrang hrangah prepaid smart energy hi hman chhoh ṭan a tum a ni. Minister chuan hemi atan hian single-phase meter 36,940 leh three-phase energy meter 3,011 sem chhuah a ni tawh a ni, a ti.

Prepaid meter-te hi Gangtok, Singtam, Namchi, Gyalshing, Rangpo, Mangan leh Jorethang-ahte vuah a ni dawn a, a hnuah rural area-ah hman tir a ni leh dawn tih sawiin, Sherpa chuan hei hian energy an hman chu nasa takin a titlem thei dawn niin a sawi.

Prepaid voucher-te hi State Bank of Sikkim emaw, Sahaj Liberty App-ah emaw lak theih a ni ang. Voucher hi Rs 200 - Rs 30,000 thleng siam a ni.