Assam-in AP thingtlang khuaa chengte insawn chhuak turin hriattir

Assam-a Harmuty range forest officer chuan Arunachal Pradesh-a Papum Pare district-a Belo, Lora, Buka leh Gumto thingtlang khuaa chengte chu Assam forest land-a awma puhin, insawnchhuak turin a hriattir.

Hriattirna hi kar liam ta Ningani khan khaw hrang hrang mite hi pek an ni a, ni 15 chhunga insawnchhuak tura tih a ni. He thil thleng vang hian heng khuaa chengte pawh a chiai phah hle.

Assam forest official-ten hriattirna an pekah hian heng khuate hi Assam Forest Regulation 1891 ( Amended Act 1995) bawhchhia a, dan loa Assam forest ram luahah an puh a ni. Hriattirna pek aṭanga ni 15 chhunga an insawnchhuah loh chuan, forest department lam chuan chhuahtir turin hma a la dawn a, harsatna leh buaina a awm a nih pawhin an mawhphurh a ni tawh lo ang, tiin an sawi.

Hetih lai hian Assam lamin insawnchhuak tura a tih khuate hi Arunachal Pradesh ram chhunga awm vek an ni.

All Nyishi Youth Association (ANYA) chuan hemi chungchang hi Assam sorkar sawipui thuai turin state sorkar an ngen. "Ni 15 hnua Assam forest official-ten dan kalha Arunachal Pradesh ram china chengte hnawtchhuah an rawn tum a nih chuan boruak a ṭha loin, a buai chho dawn hle a ni," an ti. Assam forest official-ten dan kalh leh tharum hmanga Arunachal ram neihsak an tum dan chu an dem thu sawiin, ANYA chuan ramri chungchangah state pahnihte chuan Supreme Court thupek chu an zawm tur a ni, an ti. Assam lamin an ram chin nia sawia chhuak tura an tihte chu hmanlai aṭanga awm tawh, NEFA a din hma aṭanga awm tawh an ni tih an sawi.

All Arunachal Contractor Welfare Association president Nabam Akim chuan Assam lamin hriattirna an pek khuaa chengte chu hlauthawng takin an awm mek tih sawiin, "Arunachal hian China leh Assam aṭangin kan ram min neihsak an tum vangin harsatna kan tawk fo a ni," tiin Assam official-te chuan hma an rawn la a nih chuan tualchhung mite chuan an ram venhimna turin an theih ang angin an lo beihlet ngei a rinawm thu a sawi bawk.