ILP chungchanga mipui bumah Meghalaya sorkar puh

Meghalaya-a political party thar, Voice of the People's Party chuan an state-a rorellai, National People's Party (NPP) kaihhruai Meghalaya Democratic Alliance (MDA) sorkar chu Inner Line Permit (ILP) chungchanga mipuite bumah a puh.

Regional party thar president, Ardent Basaiawmoit chuan Shillong-a press conference a neihah Assembly-a ILP chungchanga resolution lo pass tawh chu sawi chhuakin, ILP hman phutna resolution siam leh, ILP a taka kalpuina tur dan siam phutna chu thil hrang daih an ni, a ti.

Meghalaya Legislative Assembly hian kum 2019, December thla khan an state-a ILP hman a nih ve theihna tura sorkar nawrin lungrual takin resolution an lo pass tawh a ni.

Basaiawmoit chuan, "State sorkar hian ILP hman hi a duh tak zet a nih chuan, Assembly-a resolution pass kher lo hian a ti thei a ni," a ti. State sorkar chu hemi kawnga a mawhphurhna chu sorkar laipui kuta sawn a tum zawk niin a puh.