Assam-Meghalaya border chungchang Assembly-ah sawiho phawt phût

Meghalaya-a eptu pawlte chuan state sorkar hnenah Assam-Meghalaya ramri buaina chungchanga thutlukna a siam hmain Assembly House-a sawiho an phût.

Opposition chief whip PT Sawkmie chuan ramri buaina chungchangah hian tlutlukna an siamna turah, state mipui tam ber chuan an ram inchi khat pawh Assam hnena pek an duh lo a ni, a ti.

"Buaina chinfelna turah Assam hnenah hmun ṭhenkhat pek a ngai emaw, Assam-in Meghalaya hnenah a pek a ngai emaw pawh ni se, Assembly-ah sawiho a, ngaihtuah ho a ni hmasa phawt tur a ni," tiin Sawkmie chuan a sawi.

State ramri buaina hi thil buaithlak tak, chinfel mai harsa tak a ni tih a pawmpui thu a sawi rualin, Sawkmie chuan chief minister Conrad Sangma'n an state-a sorkar hmasa zawkten ramri buaina chinfel tumin hma an la lo nia a sawi chu a pawmpui lo tih a sawi nghal bawk.

Congress MLA Sawkmie chuan chief minister hlui AK Mawlong khan a hun laia Assam chief minister nen ramri buaina an neihna hmunte hi an lo tlawh tawh a ni, a ti. Ani bakah CM hlui dang DD Lapang leh Dr Mukul Sangma te pawhin hma an la a, mahse an tifel thei lo a ni, a ti. Tuna state sorkarin hma a la chu a lawmawm a tih thu leh, CM in Krismas hma ngeia buaina chinfel hman a tiam erawh chu thil theih a ni lo tih a sawi.

Hun rei tak Assam nena ramri chungchanga buaina an lo neih tawh chu chinfel a nih ngei theihna turin political party leh social organisation hrang hrangte chu hemi kawnga sorkar hmalakna thlawp turin Sawkie chuan a ngen.