Tripura : BJP-TMC intihbuainaah mi 19 hliam

Tripura-a Khowai district-a Teliamura khuaah kar liam ta Zirtawpni khan Bharatya Janata Party (BJP ) leh Trinamool Congress (TMC) worker-te intibuaiin mi 19 in hliam an tuar. He thil thleng avang hian Teliamura Municipal Council-a ward 13, 14 leh 15-ah te mi panga aia tam punkhawm khapna, CrPC Section 144 puan nghal a ni.

Party pahnih worker-te inkara buaina chhuak hi thelh tumin police-te an inrawlh nghal a, pungkhawmte hnawhdarh nan tear gas pawh an hmang a ni. Hliam tuar zingah police pahnih an tel bawk.

Buaina chhuak kaihhnawihah Teliamura police station-ah thubuai pathum ziah luh a ni a, mi panga man an ni tawh bawk a ni.

TMC hruaitu Sushmita Dev chuan Supreme Court-in November 25-a civic body inthlan tur atan party tinte chu boruak tha tak hnuaia zalen taka an campaign phalsak vek tura a ti chungin, an party candidate leh activist-te chuan beih an la tawk fo tih a sawi. Mahse BJP thupuangtu Nabendu Bhattacharya chuan hei hi chhangin, an party member-te chuan TMC worker-te an bei ngai lo tih a sawi ve thung.