Nagaland BJP President thar Temjen Imna Along

Nagaland State BJP unit chuan president thar neiin, Nagaland State Cabinet Minister ni lai, Higher & Technical Education changtu Temjen Imna Along Longkumer chu Nagaland BJP president thar atan ruat a ni.

Bharatiya Janata Party National President, Amit Shah chuan Temjen Imna hi state BJP president atan hian a ruat a, kum 2016 aṭanga he dinhmun chelh mektu Visasolie Lhoungu chu a thlak ang.

Lhoungu term hi kum thum tur a ni a, nakkum thleng tur ni mah se BJP President hnen aṭanga leh­kha lo kalah chuan a chanvo thar hi chelh nghal tura tih a ni a, Arun Singh, National General Secretary & Headquarter Incharge chuan a hming a zaikhnan a ni.

President thar Temjen Imna Along chuan Thawhlehni khan Delhi lama an hotuten eng emaw ruahmanna an neih thu chu a hria tih sawiin hetiang em em a thuchhuah an siam hma erawh a rin loh thu a sawi. Visasolie Lhoungu chu hotu ṭha tak a nih thu sawiin BJP a la nih reng thu a sawi bawk.

Central lama BJP hotu-te thutlukna siam thut hian Naga­land BJP worker eng emaw zat chu a barakhaih hle thung a, BJP member eng emaw zat chuan mak an tih thu leh thu lawmawm nge lawmawm lo a nih thu pawh an hriatthiam loh thu an sawi.

Hemi avang hian PDA sor­karah pawh eng eng emaw siam­rem a ngai maithei a, PDA thu­puangtu Merentoshi Jamir chuan thutlukna chu an hriat chawpchilh avangin engtin nge hma an lak zel dawn tih an la sawi theih loh thu a sawi a ni.