NEIGRIHMS Cardio Deptt doctor-te nuar

North Eastern Indira Gandhi Regional Institute of Health and Medical Sciences (NEIGRIHMS)-a department of Cardiology doctor-te chuan Thawhlehni khan thuchhuah siamin nimin aṭang khan an nawrh dawn thu leh, ni thum chhung an hna an thawh dawn loh thu an sawi.

Cardiolody department doctor-te chuan NEIGHRIMS Director luhlul vangin nawrh hi an huaihawt tih an sawi bawk.

Ni thum chhung nuar tura thutlukna hi Thawhlehni khan siamin Director, Prof. (Dr.) D. M. Thappa hnen aṭanga chhan­na an hmuh loh vangin thutlukna hi an siam a ni. Mahse emergency service leh bed side care-te chu an enkawl dawn tho tih an sawi thung.

Cardio department doctor-te hian Director hian DM aspirant te exam fee North-Eas­tern Hill University (NEHU)-a thehluh tur chu a pawm­sak duh lo niin an sawi a, pawm tura nawr in a pawm duh loh chhan an zawt bawk.

The Shillong Times report chuan Prof. (Dr.) D. M. Thappa hian exam hun chu NEHU ruat a nih avangin MD student-te chu University dan hi zawm turin a ti niin an lo chhuah tawh thung a, Head of Department, Cardiology chu an application form vel buaipuitu tur a nih thu a lo sawi tawh bawk niin an tarlang.

Hei hi doctor te chuan chhanglet in application form chu HOD ni lo in, adminis­trative lam leh Controller of Examination Cell buaipui tur a nih thu an sawi ve thung.

Department lam chuan Director hian NEHU emaw Medical Board thuchhuah chu a zawm lo fo tih sawiin a thusawi chu dawt mai a nih thu an sawi a ni.