SBI in sazu laka ATM ven dan ngaihtuah dawn

India rama banker lian ber, State Bank of India (SBI) chuan thuchhuah siamin an ATM-te sazu chi reng reng laka ven a nih theih nan hma an la dawn tih an sawi.

Hmarchhak bial SBI Chief general manager Sunil Kumar Tandon chuan Thawhlehni khan pest control chungchang te pawh an ngaihtuah dawn thu leh sazu laka an ATM ven dan tur te an ngaihtuah dawn thu a sawi a ni.

Assam-a Tinsukia district-a ATM pakhatah Thawhṭanni khan sazu in pawisa note cheng 12,38,000 vel a lo chip sawm vek a, hemi avang hian SBI chuan thuchhuah an siam ta a ni.

Kumar Tandon chuan ATM enkawl tur third party vendor an rawih fo thu sawiin he thil thleng­ah pawh hian third party vendor an ruai tih a sawi.

Bank official-te chuan third party vendor, Gu­wa­hati-based financial company-te chuan May 19 khan Laipuli ATM-ah hian cheng nuai 29 an dahluh thu report a nih thu an sawi a, a tuk aṭangin he ATM hian hna a thawk thei lo nghal tih an sawi.

June 11 khan bank chuan ATM siamṭha tur hian technician an ruai a, hetah hian pawisa note tam zawk, cheng 2000 leh 500 note te chu sazu in an lo chip sawm vek tih an sawi bawk. Cheng nuai 17 vel chu him taka a la awm thu an sawi a ni.

Hetih lai hian May 20-a chhe tawh si June 11-a siam a nih chauh avang hian zawhna a tam hle a, ATM a ṭhat loh hian a enkawltu lam hnenah signal a pek vat ṭhin avangin thla khat dawn lai rial a nih avang hian zawhna a tam hle.