Manipur tuilian vangin Mi 51,000 aia tam sawnchhuak tawh

Manipur sorkar chuan state chhung hmun hrang hranga tuilian chu uluk taka an vil reng thu sawiin, Thawhlehni kha chuan ziaawm lam a pan tih an sawi.

Thawhlehni chawhnu lam thleng khan tuilian vang hian state chhung hmun hrang hrangah mi 51,689 chu an awmna aṭanga sawnchhuah an ni tawh a, relief camp 174 hawn tawh niin heng relief camp-ah hian mi 59,170 an awm mek a ni. Medical camp 24 siam tawh niin tuilian tuarte mamawh hi pek reng a ni bawk a, central leh state force-te chu ṭanpui ngaite ṭanpui tur hian dah an ni bawk.

Tuilian hian thingtlang khaw 304 a nghawng a, thlai chinna ram hectare 3,947 chimin in 23,456 a tichhe tawh. Mi pasarih in nunna an chan tawh a, mi pakhat chin hriat lohin a awm mek bawk a, mi 1,80,102 vel a nghawng tawh a ni.

Tui a len nasat avang hian lei tam tak pawh a chhe tawh a, lei eng emaw zat chu a len bo bawk. Pradhan Mantri Gram Sadak Yojana hnuaia kawngpui siam pawh a tichhe nasa hle.

Manipur tuilian tuarte chhawmdawlna tur hian ṭanpuina pawh mi tam takin an pe tawh a ni.