Tripura CPI(M) hruaitu thah case uluk takin Chhuichian a ni dawn : Chief Minister

CPI(M) MLA-ten Assembly House chhuahsan

Tripura Chief Minister Biplap Kumar Deb chuan Nilaini khan Assembly-ah CPI(M) hruaitu hlun Panisagar Sub-division mi Tapas Sutradhar thah a nih dan chu uluk taka chhui chian a ni dawn tih a sawi.

Tapas Sutradhar hi June 18 zanlaiah khan inneihnaa a kal haw thah a ni a, CPI(M) MLA Tapan Chakraborty chuan zero hour laiin hemi chungchang hi sawichhuakin uluk taka chhuichian a phut thu a sawi chhuak a ni.

Chief Minister chuan DGP pawh uluk taka chhui tura a hrilh tawh thu sawiin North Tripura SP pawhin pawikhawihna thlenna hmun hi a tlawh tawh niin a sawi.

Hetih lai hian Nilaini hian Assembly house aṭang hian CPI(M) MLA-te chu an chhuak tau a, BJP legislator-te nen nasa taka an inhnial hnuah house hi an chhuahsan a ni.

BJP legislator Dilip Das-an Assembly pawimawh neih laia CM hlui Manik Sarkar-a awm loh chungchangah zawhna a siam vang leh, a hma ni pawha National Anthem play a nih zawh hnua house a luh chungchangah te zawhna a siam avanga inhnial buaina a chhuah a, eptu pawl MLA-te chuan house hi an chhuahsan.

CPI(M) MLA Badal Chowdhury chuan Dilip Das chu chhanglet in Manik Sarkar chu an party hruaitu hlun thihnaa a kal thu a sawi a, a chhan zawh hma hian BJP MLA dangin an lo hnial leh nghal a, Sarkar a dem thuin a rawn hnial leh nghal a ni.

Hemi avang hian inhnialna nasa tak a chhuak zui a, eptu pawl lam chuan house hi an chhuahsan zui a ni.