Nagaland : Myanmar border-ah night curfew puang

Nagaland leh Myan­mar inrinaa district pahnih­ah Thawhlehni zan aṭang khan night curfew puan a ni.

Hel ten Assam Rifle patrol an lambunnaa mi pahnih laiin an nunna an chan hnu ni hnihah curfew hi puan a ni a, zan dar 10 aṭanga zing dar 3 thleng curfew hian a huam ṭhin ang.

Nagaland leh Myan­mar inrinaah hian district pali awmin heng zinga district pahnih Mon leh Tuensang district-ah te curfew hi puan a ni.

K. Thavaseelan, Mon’s Deputy Commissioner chuan CrPC Section 144 hnuaiah thupek hi tih­chhuah a nih thu sawiin Thawhlehni aṭang khan hman ṭan a nih thu a sawi a, thla thum chhung a awh dawn tih a sawi bawk. Thavaseelan chuan February 21-a curfew puan tawh chhugzawmna a nih tel thu sawiin Lok Sabha by-election vanga tihkhawtlai mai a nih thu a sawi. Lok Sabha inthlan hi May 27 khan neih niin Nationalist Democratic Progressive Party candidate Tokheho Yepthomi chuan hnehna a chang nghe nghe.

Mon leh Tuensang hi Na­galand leh Mynamar inrinaa district awm ho zinga hlauhawm zual nia ngaih a ni a, helna leh in­beih­na a tam hle a ni. Natio­nal Socialist Council of Na­ga­land (NSCN-K) te pawh heng lai hmunah hian a awm nual nia sawi a ni bawk.