Assam police-ten ULFA account block turin ngen

Assam police-te chuan Assam hel pawl United Liberation Front of Assam (Independent) facebook account chu block turin US lama Facebook thuneitute an ngen.

Police-te hian ULFA account pakhat an block hnu lawk rei lo teah hel pawl hian account an siam thar leh a, hemi a nih avang hian thuneitu lamah ngenna hi an thlen ta a ni.

Additional director-general of police (security) Harmeet Singh chuan Nilaini khan Facebook nodal office, New Delhi hnenah ngenna hi an thlen tawh thu a sawi a, hel pawl te hian social media dik lo taka an hmanna tur laka invenna atana ti an nih thu a sawi.

Harmeet Singh chuan ULFA(I) account hmasa an block hnu lawkah hel pawl te chuan a dang siam nghalin an IP (Internet protocol) address an thlak nghal thu a sawi. Hemi anih avang hian sorkar laipui hnenah ngenna thlenin Facebook thuneitute chu ULFA account block sak tura ngenna an siam tir thu a sawi a ni.

ULFA(I) chuan Zirtawpni kalta khan Facebook-ah acoount an siam thu an sawi a, hei hi an helna kawnga experiment pakhat a nih thu an sawi. Email leh Telephone in a thlen theih loh chin an thlen theih nana ti an nih rin a ni.

An account an hawn hnu lawkah hian an friend list-ah mi ṭhahnem tak an awm nghal a, mi ṭhenkhat phei chuan hel pawl account wall-ah hian an phone number-te an post hial nghe nghe.

Hemi a nih avang hian state police chuan suo motu case register nghal in an chhui zui nghal a, an account hi an block sak nghal a, mahse a hnu lawkah ULFA hian account thar an siam zui leh nghal a ni.