Manipur sorkar in MU VC ngenna hnawl

Manipur University (MU) vice-chancellor Adya Prasad Pandey-an sorkar hnena security pe tura a ngenna chu Manipur sorkar chuan a hnawlsak.

Adya Prasad Pandey hian Chief Minister N. Biren Singh-a hnenah university-in an kalphung pangngai anga hun an hman leh theih nan ngenna a thlen nia sawi a ni a, VC hian CRPF-te venhimna a phut nia sawi a ni.

Mahse sorkar chuan thil awm dan ngun taka a thlir hnuah a remtihsak ta lo a ni.

Hetihlai hian Manipur Univer­sity Students’ Union chuan Pan­dey-a ban tir hi an ngiat a, Ningani pawh khan human chain siamin vice-chancellor Adiya Prasad Pandey thlak an duhna an lantir.

Students’ union president, Dayaman Mayanglambam chuan ni 23 an nawrh tawh thu sawiin chief minister, governor, President, Prime Minister leh Union HRD ministry-te hnenah pawh ngenna hi an thlen tawh thu a sawi a, mahse chhanletna an la hmuh loh thu a sawi.

VC thlak tura an nawrna chu an chhunzawm zel dawn thu a sawi bawk.

Manipur University Teachers’ Association (Muta) pawhin Zirlai pawl hi thlawpin Pandey-a hi insawifiah turin an lo nawr ve tawh bawk a ni.

June 11 khan zirlai pawl te hian VC lem te pawh hi an lo hal tawh a, Pandey pawh hian zirlaiten an puhnaah hian June 17 khan insawifiahna a lo nei tawh a ni.