Tripura police-in TMC hruaitu tualthah tumah puh

Tripura police-te chuan Pathianni khan Trinamool Congress (TMC) hruaitu Sayani Ghosh chu Inrinni zana chief minister Biplab Kumar Deb thusawi lai tibuaia aukhumah puhin an man a, tualthat tuma puhna thubuai an siamsak.

Police-te chaun TMC West Bengal youth unit secretary Ghoshi Agartala police station-ah thu zawhfiah tura koh a ni hnua man a nih thu police official chuan a sawi.

West Bengal-a rorellai, Mamata Banerjee kaihhruai TMC hian Tripura lamah an huang zauh tumin hma an la mek a, kum 2023 assembly inthlanah chuh an tum bakah November 25-a civic body inthlan neih turah pawh candidate an siam a ni. Hetih lai hian Tripura-a rorellai, BJP worker leh TMC worker-te inkarah buaina a chhuak fo a, kut inthlaknate pawh a thleng fo a ni.

Police official chuan Inrinni zana kawtthlera meeting buatsaiha chief minister thusawi lai chu Ghosh hian 'Khela hobey' (We will play) tiin a vau niin a sawi. He thu hi TMC hian kumin March-April thlaa West Bengal assembly inthlanah khan an slogan atana an hman a ni. CM thusawi a aubuai hnuah Ghosh kalpui mi ṭhenkhat chuan meeting-a telte chu lungin an vawm zui niin an sawi bawk. He meeting-ah hian mi 50 vel an awm niin an sawi.

Sayani Ghosh man a nih leh, TMC worker-ten beih an tawk fo avanga lungawi loin, Pathianni zan khan TMC MP 15-te chuan Kolkata aṭangin Delhi an pan nghal a, union home minister Amit Shah hmuh an tum.

TMC chuan Ghosh leh amah ṭawiawmtu, MP Sushmita Dev, Kunal Ghosh leh Subal Bhowmik-te chu East Agartala women police station-a hruai an nih hnuah beih an tawk zui niin an sawi bawk. Buaina chhuakah anmahni thlawptu mi parukin hliam an tuar bawk tih an sawi bawk. Supreme Court-in Tripura police-te hnenah political party hrang hrangte chu boruak ṭha tak tak hnuaia zalen taka an campaign phalsak vek turin hriattir tawh mah se police-te hian court thupek hi an zah lo a, an zawm duh lo niin TMC chuan a sawi.