Agartala-ah phalna nei loa ran talh leh zawrh khap

Tripura High Court chuan Agartala Municipal Corporation (AMC) hnenah khawpui chhunga hmun hrang hranga phalna nei loa ran talh leh zawrh ṭhin titawp tura hma lak thuai turin a hriattir.

Chief justice Indrajit Mohantu leh justice Satya Gopal Chattopadhyay awmna division bench chuan advocate Arijit Bhaumik petition thehluh a ngaihtuah hnuah he hriattirna hi a tichhuak a ni.

High Court-ah petition thehluhah hian Agaratala khawpui chhung hmun hrang hrangah, hmun ṭhenkhatah phei chuan kea kalna hmun, pavement-ahte Municipal Corporation aṭanga phalna nei loa ar leh sangha zuar an awm ṭhin tih sawiin, hei hi Tripura Municipal Act, 1994-a Section 187/188/189 bawhchhiatna a nih thu a tarlang.

Division bench chuan AMC leh a enforcement wing hnenah Agartala khawpui chhhunga phalna nei loa ran talh leh zawrhna hmunte chu an awmna hmun sawn a, mihringte ei tur a nih avangin hmun thianghlim leh felfai zawka awm tir dan tur ngaihtuah turin a ti. Hemi chungchangah AMC chu kar li chhunga affidavit thehlut turin a ti a, December 14-ah hearing neih leh a ni ang.