Kristian rinna humhimna tur chuan jail bang zut ka inhuam: Shürhozelie Liezietsu

Nagaland Chief Minis­ter hlui leh Naga People's Front(NPF) president Shürhozelie Liezietsu chuan Nagaland-a Kristian rinna humhimna tur chuan jail bang zut pawh a in­huam thu a sawi.

NDPP-ten ‘a President on bail’ tia an koh chu chhangletin NPF President chuan thudik a ṭan tlat thu sawiin a rinna humhimna tur chuan jail-a tan pawh a inhuam tih a sawi. A mangan dawn loh thu sawiin, mipui leh a rinna a humhimna tur a nih phawt chuan a inchhuang zawk hle dawn tih a sawi bawk.

Shurhozelie chuan bye-elec­tion nieh hma lawk khan NDPP ten a lakah FIR an thehluh thu sawiin, sakhuana chungchanga a thusawi vanga FIR hi thehlut an nih thu a sawi a ni.

NPF president chuan India danpui Article 25-na hnuaiah Nagaland chuan sakhaw zalenna an neih thu sawiin, hetiang hi ni mah se BJP sorkarna state ṭhenkhatah chuan sakhaw zalenna hi a awm tawh lo a ni, a ti. Hemi a nih avang hian Kristian rinna chu humhim tlat a tum thu a sawi a, an party hruaitute pawh thudik sawia ramchhung-a Kristian te thil hmachhawn mek pawh sawi hreh lo turin a ti bawk.

Shurhozelie chuan India ramchhung hmun hrang hranga Kristian-te laka tihduhdahna awm mek chu sawichhuah a hreh ve lo tih sawiin NDPP-te chuan hemi vanga amah an man duh a nih chuan hun an ngah hle ang tih a sawi. A rinna chu humhim tlat a tum thu sawiin tuman an dan theih dawn loh thu a sawi bawk a ni.