Tripura: CPI(M) activist ten Tuialhthei man sang zel duh lohna lantir

Communist Party of India- Marxist (CPI-M), West Tripura District Committee-te chuan Zirtawpni khan petrol leh diesel bakah eirawngbawlna gas man sang zel duh lohna lantir nan kawng an zawh.

June 19-a state budget pharhah petrol, diesel leh eirawngbawlna gas-a chhiah lak zat tur tihsan a nih avangin an duh lohna lantir nan kawng hi an zawh a ni.

Kawngzawhnaah hian MP Jharna Das Baidya, MP Sankar Prasad Baidya, Minister hlui Manik Dey leh Deputy Speaker hlui Pabitra Kar te pawh an tel a, CPI(M) office Melarmath aṭanga kawngzawh hi ṭanin Paradise Chowmani-ah thusawina hun an hmang a ni. Party hruaitute chuan petrol, diesel leh gas man sang zel hi an duh loh thu leh chhiah san tur pawh hi hnawl ngam tura sorkar an nawrna thu te an sawi bawk.

Assembly Deputy Leader Badal Choudhury pawhin a hma in petrol leh diesel bakah LPG gas man sang zel chu a duh loh thu a lo sawi tawh bawk a ni.

Tripura Pradesh Congress President, Birajit Sinha pawhin tuilahthei man san leh mi lu lak chu a inang reng a ni, tiin a lo sawi ve bawk.

CM Biplab Kumar Deb chuan an budget pharh chu Tripura history-a thil chhinchhiahtlak a nih thu lo sawi tawh mah se sawiselna a nasa hle a, eptu lam phei chuan nasa takin an sawisel mek zel a ni.