Manipur collector-in India ram chin a hek thu sawi

Manipur leh Myammar inrinaa Collector chuan Pathianni khan India ram chin chu a hek thu sawiin hemi a nih avang hian Survey report pawh a sign duh lo tih a sawi a, India ram chin chhinchhiahna pillar chu a awmna a dik lo tih a sawi.

Tengnoupal Collector A. Tombikanta chuan boundary pillar awmna hmun dik tak a zawng tih sawiin Kwatha Khunou khaw mite chuan pillar awmna hi a dik lo tih an sawi thu a sawi a, boundary pillar No. 81 hi an khaw chhungah a awm daih tih an sawi bakah India ramri aṭanga India ramchhung km. 3-a thuiah dah a nih daih nia an sawi thu a tarlang bawk.

Tombikanta chuan May 22-a helai hmuna post a nih aṭang khan state Home Department bak­ah midang hnen aṭang pawhin nawrna nasa tak a tawh thu a sawi a, heng nawrtute hian India ramri-ah buaina a awm lo nia report siam tura an nawr thu a sawi a ni.

Mahse pillar No. 81 awmna chu a dik lo nia report a awm avangin report a ziah duh loh thu leh, sorkar chu boundary pillar No. 82 leh 83 awmna pawh check chiang turin a tih thu a sawi. Kwatha Khunnou khaw mite chuan pillar No. 81 bakah sub-pillar dangte pawh an khaw chhungah a awm vek thu an sawi a, ramri tak chu km thuma hlaa awm daih a nih thu an sawi a ni.