Assam-ah Social Media account lem neitu man

Assam-a Nagoan-a mi pakhat chu Twitter account lem siam vangin Pathianni khan police-ten an man.

Police-te chuan an mi man hi Md Ikramul Haque a nih thu an sawi a, Haque hian a nupui unaupa Md Jakir Hussain hmingin account lem hi a siam a, Jakir-a thlalak te pawh hi a hman bakah a account lem siam aṭang hian August 15-ah Guwahati-ah bomb a tihpuah dawn thu te a post bawk a ni.

Nagaon Police-te chuan he account-a thlalak hi Md Jakir Hussain a nih thu an chhui chhuak nghal a, mahse Jakir-a tih tak tak hi a nih an ring lo niin report chuan a tarlang a, account lem a nih an ring nghal nia tarlan a ni. Hemi anih avang hian police-te chuan an chhuizui a, Jakir-a unaunu pasal Md Ikramul Haque-a siam a ni tih an chhuichhuah hnu hian Haque pawh hi an man nghal niin an tarlang.

Haque hnen aṭang hian desktop computer, mobile phone leh camera, pawikhawihna atana a hman te hi police-te chuan an man tel nghal bawk.

Haque hian a nupui, Jakir-a unaunu chu a sawisak ṭhin avangin a lakah hian Jakir hian Dhing police station-ah thubuai a lo thehlut tawh a, hemi avanga phuba lak nan hian Haque hian Jakir-a hming hian Twitter-ah account lem siamin man tir a tum nia sawi a ni.