Manipur University Students Union in CM sawmna hnawl

Manipur University Stu­dents’ Union (MUSU) chuan Chief Minister N. Biren Singh-an Manipur University vice-chancellor chungchanga inbiakna neihpuia a sawmna chu an hnawl.

MUSU chuan chief minister sawmna an hnawl chhan hi chief minister hian University vice-chancellor, Adya Prasad Pandey paih theihna emaw, sawn tur emawa thuneiha a neih loh vang tih an sawi a, a thuneihna piah lam a nih thu an sawi.

Hetihlai hian zirlai pawl te hian nawrh an la huaihawt chhunzawm zel a, university campus-ah sit-in protest neiin VC hi sawnchhuak vat turin thuneitute an ngiat a ni.

MUSU, Manipur University Teacher’s Association (MUTA) leh Manipur University Staff Association-te chuan Inrinni khan joint meeting an nei a, an meeting resolution chuan human resource development (HRD) ministry joint secretary-in MUTA hmuh a duh lo chu na taka an dem thu an tarlang.

Heng pawl pathumte hian inthurual in VC sawnchhuah a nih theih nan hian nawrh huaihawt chhunzawm zel an tum thu an sawi.

MUSU president, Mayang­lambam Dayaman chuan HRD secretary in an lungawi lohna chung­chang chu chief minister hnena state sorkar in lo buaipui tura a ti chu an dem thu a sawi bawk.

Hetihlai hian HRD joint secretary chuan secretary hnenah buaina chinfelna tur a lo sawipui dawn tih a sawi ve thung.

MUSU nawrhna hi thlawpin Local Surrounding People of Manipur University, Canchipur (LSPOMUC), Social Young Club-Kakwa leh Sorokhaibam Youth Development Association-te pawhin Kakwa Keithel-ah sit-in protest an nei ve bawk a ni.

Manipur Univeristy VC Pandey hi a office chu night club ang maia hmangah puh a ni a, bullet-proof car lei nan pawisa tam tham tak hmangah puh a nih bakah sawi lawk loa zin chhuah a hrat hle nia puh a ni bawk. A zin veivahnaah hian university pawisa tam tham tak hmanga puh a nih bakah office pawh a kal khat hle nia puh a ni a, contract hna ruak awmah te chuan a duhsak zawng a thun zel nia puh a ni bawk.