Manipur University VC in ban a tum lo ; Zirlaiten an puhna a pawm lo
Manipur University Vice-Chancellor Adya Prasad Pandey chuan Pathianni khan a hna aṭanga ban a tum loh thu leh Manipur University Students’ Union-ten an puhna pawh chu a pawm loh thu a sawi.
Pandey chuan Manipur-ah hian University hnuaia thawk turin ka lo kal a, bang turin ka lo kal lo, a ti.
Zirlai pawl ten an puhna zawng zawng pawh chu a pawm loh thu sawiin, thu belhchian dawl lo a nih thu a sawi a, puhna dik lo tak chu chhanna pawh pek a tum lo tih a sawi.
VC chuan zirlai pawl te nawrhna chuan zirlaite hmalam hun a tichhe hle tih a sawi bawk a ni.
October 26, 2016-a Manipur University VC hna a chelh ṭantirh aṭang khan zirlai pawl te chuan thu dik lo hmangin an bei char char tih a sawi a, harsatna tam tak a tawk tawh tih a sawi bawk.
State pawna a zinchhuah ṭhin chhan pawh thil pawimawh leh ṭul vang a ni tih a sawi a, University ṭhatna tur leh hmasawnna tur ngaihtuaha a zinchhuak pawh office zah lo tia an puh chu thil mak tak a nih thu a sawi a ni. "Mi puhna zawng zawng hi thu dik lo vek a ni", a ti.