NEIGRIHMS resident doctor ten an nawrh titawp

North Eastern Indira Gan­dhi Regional Institute of Health and Medical Sciences (NEIGRIHMS)-a Cardiology Department resident doctor-te chuan Institute Director, Dr M Thappa-an darkar 72 chhunga buaina chinfelna tur buaipui a intiam avangin nawrh an huaihawt chu an titawp.

Thawhṭanni khan resident doctor, zirlaite leh Director-ten rei tak meeting an neih hnuah thutlukna hi siam a ni.

Meeting hi darkar li zet neih a ni a, resident doctor-te chuan an lungawi lohna bakah an harsatna tawh te an sawichhuak a, ziaka sawi­fiahna an phut thu an sawi. Cardiology department faculty te pawhin an lungawi lohna te sawichhuakin kum liamta chhunga exam chung­changa buaina awm te, department hrang hranga thil fel tawk lo awm te chu pawi an tih thu an sawi bawk. Faculty-te chuan kum 15 kalta chhung khan hetiang buaina hi a thleng ngai lo a ni, an ti.

Resident doctor pakhat chuan exam chungchanga buaina awm leh inbiak fuh lohna awm avangin Director chuan ngaihdam a dil niin a sawi.

Report chuan Dr. Thappa hian quarter allotment chung­chang pawh tihfel a ni dawn tih a sawi niin a tarlang a, exam hun chungchangah pawh NEHU lam biak a tum tih tarlan a ni bawk a, hemi chungchangah hian HOD-te pawh a be rawn dawn tih an tarlang bawk.

Director chuan DM car­diology zirlaite term pawh pawhsei a, exam tura inbuat­saihna hun ṭha an neih theihna turin hma a la dawn tih an sawi bawk a ni.

Meeting thuchhuak hi NEIGRIHMS resident Doctors association (NRDA)-te pawh hriattir nghal an ni bawk a, doctor-te pawh hian meeting neih zawh hnu hian an nawrh huaihawt chu an titawp zui ve nghal bawk.