Facebook in ULFA-I account block

United Liberation Front of Assam-Inde­pendent (ULFA-I) Facebook account chu a vawi hnih nan block sak an ni leh ta.

ULFA-I hian a hmain account pakhat an siam tawh a, mahse Assam police-te chuan an lo block sak tawh a ni. Hemi avang hian IP address thlakin account dang an siam leh a, Assam police-te chuan Facebook thuneitue hnenah sorkar laipui kaltlangin block sak turin an ngen a, Facebook thuneitute chuan an block sak leh ta a ni.

June 16 khan hel pawl te hian Facebook account an siam thu an puang a, June 18 khan police-te chuan an block sak nghal a, mahse a tuk lawkah account dang hi an siam leh nghal a ni.

ULFA te hian scoial media hmangin ṭhalai te rilru hneh an tum nia sawi a ni a, account an hawn hnu lawk hian an friend list-ah mi tam tak an awm nghal bawk. Mi ṭhenkhat phei chuan an wall-ah an phone number-te an post hial niin police-te chuan an sawi.