Assam-ah CAA dodalna tharthawh leh tum

Sorkar laipuiin sawisel hlawh tak farm law pathum a siamte a sut leh dawn tih a sawi hnuah, Assam-a pawl hrang hrangte chuan Citizenship Amendment Act (CAA) duh lohna chu tharthawh leh an tum.

Kum 2019 khan Assam-a CAA dodalna hi nasa taka lantir niin, duh lohna lantirtu langsar zingah hian All Assam Students' Union (AASU), Krishak Mukti Sangram Samiti (KMSS) te an tel. Nawrh huaihawtnaa an hruaitu zinga ṭhenkhat chuan a hnuah political party, Raijor Dal (RD) leh Assam Jatiya Parishad (AJP) an din zui bawk. Heng pawlte hian CAA dodalna lantir thar leh tura hmalak dan ngaituahin an sawiho leh mek a ni.

Hmarchhak biala pawl tam takin CAA hi an duh lo a, state hrang hrangah dodalna pawh hi an lo lantir tawh a ni. Mahse Covid hri leng avangin nawrh huaihawt lian tham tak te chu an buatsaih chhunzawm thei lo a, mahse sorkar laipuiin farm law a sut leh tak avangin CAA pawh sut tir tura hma lak thar ve leh an tum tih an sawi.

AASU chief advisor Sumujjal Kumar Bhattacharjya chuan prime minister Narendra Modi kaihhruai sorkar chuan mipuite tana thil ṭha lo, rorelna dik lo a nih avangin farm law chu a sut leh ta a ni tih sawiin, "CAA pawh hi hmarchhak leilung fate tana thil ṭha lo, an dodal tlat a nih avangin sorkar laipui pawh hian a sut ve leh a ngai a ni. AAS leh North East Students' Organisation (NESO) chu CAA kan dodalna kawngah kan dinna ngaiah kan la ding reng a ni," a ti. NESO leh pawl dang 30-te nen anti-CAA movement kalpui thar leh dan tur an sawiho mek tih a sawi bawk.

KMSS joint secretary Mukut Deka pawhin an pawl chuan CAA chu a dodal reng tih sawiin, mipuite pawh he dan duh lohna lantira inlungrual zel turin a ngen. "CAA kan duh lohna hi lungrual taka kan lantir zel a ngai a ni. Movement kalpui leh dan tur hi November 27-a KMSS meetingah kan sawiho dawn a, he hunah hian district leh central lama hruaitute pawh an tel dawn a ni," a ti.

ASSU hruaitu hluiten political party an din, AJP pawhin CAA chu sut leh anih theihna turin an bei zel dawn a, he dan duh lohna lantira nawrh huaihawt zel tur thu an sawi. AJP thupuangtu Ziaur Rahman chuan, "Sorkar laipui chuan CAA kalpuina tur dan hi a la duang fel lo a, mipuiten an dodal a la hlau a ni. Hei vang hian CAA kan duh lohna kan lantir chhunzawm zel a ngai," tiin a sawi.