Ramri chungchangah Assam leh AP aiawh inbia

Arunachal Pradesh home minister Bamang Felix chuan Assam nena ramri buaina chungchang an neih mekah state pahnih aiawhten inbiakna an nei ṭan tih a sawi.

Kar liam ta khan Assam forest department chuan ramri bula Arunachal Pradesh thingtlang khaw pathuma chengte chu an awmna hmun chhuahsan turin hriattirna a lo pe. Arunachal Pradesh chuan heng khuate hi an state ram china awm nia sawiin, Assam lam thiltih dan avang hian an lungawi lo hle.

Felix chuan he thil thleng hi a pawi a tih thu sawiin, chief minister Pema Khandu pawhin Assam chief minister Himanta Biswa Sarma chu hemi chungchang hi a sawipui nghal a, state chief secretary leh inspector general of police-te pawhin Assam lam aiawhte an sawipui tawh bawk a ni, a ti.

AAPSU-in state sorkar dem

All Arunachal Pradesh Students' Union (AAPSU) chuan Assam nena ramri buaina an neih chungchangah state sorkar a ngawi rei lutuk chu an dem thu an sawi.

Assam forest officer-in AP khaw mite insawnchhuak tura hriattirna a pek leh, dan kalha Papum Pare district-a Kimin sub-division huam chhunga Assam lamin land survey an nei chu an dem thu sawiin, AAPSU chuan he thil thleng hi AP sorkarin harh chhuah nan hmang se an duh thu an sawi a ni.

AAPSU president Hawa Bangng leh general secretary Tobom Dai-te chuan thuchhuah siamin, ramriah boruak muanawm tak a awm an duh thu an sawi a, hemi rual hian Assam lamin state pahnih ramria dan kalha thil a tih ṭhinte tihtawp tura an phut thu an tarlang. Arunachal Pradesh sorkar chuan hetiang thil thleng hi Assam sorkar bakah sorkar laipui pawh sawipui thuai tura an phut thu an tarlang bawk.

State pahnihte ramri chungchanga an buaina chu court pawn lamah chinfel an tum thu CM-in a lo sawi tawh chu sawi lang lehin, chinfel a nih theihna turin heng buaina hmunte hi tlawh turin Khandu chu an phut bawk a ni.