Assam-Meghalaya joint team-in ramri tlawh

Assam leh Meghalaya joint ministerial-level team chuan state pahnihte ramri chungchanga buaina chinfel tuma hma an lak meknaah, Thawhlehni khan Assam-a Kamrup district-a ramri buaina an neihna hmun hrang hrangte an tlawh.

Joint team-ah hian state pahnih MLA-te bakah, civil leh police official-te an tel a, ramri hrul khuaa chengte leh khaw hotute pawh kawmin, an ngaihdante an zawt kual bawk a ni.

Assam lam aiawhte hi water resources minister Pijush Hazarika-a'n a ho a, Meghalaya lam hi deputy chief minister Prestone Tynsong-a'n a ho thung. Jirmigaon, Bakhalapar, Lungkhung, Patgaon, Bandhapara leh hmun dangte an tlawh a ni. Hazarika leh Tynsong hian an chief minister-te ve ve hnenah report an thehlut ve leh ang.

State pahnihte ramri chungchanga buaina hi hmun 12-ah an nei mek a, heng zinga hmun paruk chu a thawh khatnaah chinfel hmasak phawt an tum. State pahnih chief minister-ten meeting an neih hnuah kumin August thla khan hemi chungchang buaipui tur hian committee pathum ve ve an din a ni. Heng committee-te hian ramrite hi tlawhin, state sorkar hnenah November 30-ah report an thehlut dawn a, stakeholder hrang hrangte nena sawiho hnuah thutlukna chu December 30 hmain state pahnihte hian tihchhuah hman an tum a ni.