Manipur kawngpui dan vangin motor 800 chuang tangkhang mek

All Tribal Students’ Union Manipur (ATSUM), All Naga Students’ Association Manipur (ANSAM), Kuki Students’ Organisation (KSO) leh an hnuaia pawl hrang hrangten tiam chin awm loa National Highway an dan avangin bungraw phur truck 800 chuang Mao Gate bulah an tangkhang mek.

Zirlai pawl hrang hrangte hian Hill Areas Committee (HAC)-in Autonomous District Councils Bill an siam chu Manipur Legislative Assembly-a pharh leh sawiho tura special session ko turin state sorkar an phut a ni. Mahse an thil phut hi sorkarin an hun pek chhunga a tihhlawhtlin loh avangin Thawhṭanni aṭang khan tiam chin awm loin Manipur pawhtu kawngpui hi an dang ta a ni.

ANSAM general secretary AC Thotso chuan, boruak ṭha tak hnuaia nawrh huaihawtin sorkar chu vawi tam tak an nawr tawh a, mahse sorkar lam hi a ngawih reng avangin thlan tur dang an nei ta lo niin a sawi. State mipuite pawh an thiltih chu thlawp tur leh, tribal-te dikna chanvo humhalh tura an beihna kawngah thawhpui turin a sawm bawk.