Meghalaya Congress MLA 12-in TMC an zawm

Meghalaya-a eptu pawl, Congress party MLA 17 zinga 12-te chuan Nilaini zan khan Trinamool Congress (TMC) party an zawm a, an zingah hian chief minister hlui Mukul Sangma pawh a tel.

MLA-te hian Nilaini zan dar 10 vel khan assembly speaker Metbah Lyngodh hnenah Trinamool Congress an zawm thu hi ziakin an thehlut a ni. Thawhlehni khan Congress party hruaitu zinga Kriti Azad leh Ashok Tanwar bakah, Janata Dal (United) hruaitu hlui Pawan Varma-te pawhin Delhi-ah TMC hi an lo zawm tawh bawk.

West Bengal-a rorellai, Mamata Banerjee party TMC hian Bengal pawn lamah an huang zauh tumin tun hnaiah ṭan an la chho hle. Assam, Goa, Uttar Pradesh, Bihar leh Haryana bakah Tripura-ahte an lut tawh a, TMC an len chhohnaah hian Congress party hi a tuartu lian ber zingah an tel a ni.

Chief minister hlui, Assembly-a leader of opposition ni mek Mukul Sangma hi central lama Congress hruaituten amah be rawn loa State Congress hruaitu atana Vincent H Pala an ruat chungchangah a party hotute chungah hian a lawm lo hle nia sawi a ni. Sangma leh Pala hi a hma aṭangin an inkar boruak a ṭha vak lo a ni.

Congress MLA 12-ten TMC an zawm tak avangin TMC hi state chhunga eptu party lian ber a ni zui dawn ta a ni.

Anti-defection law hnuaiah legislature group-a member hmun thuma ṭhena hmun hnih chinte chu party dangah an inchhunluh phalsak an nih avangin, TMC zawmtu Congress MLA-te pawh hi disqualify an ni lo ang.

Meghalaya-ah hian TMC hi kum 2012 khan an ding ṭan a, kum 2023 state assembly inthlan neih turah pawh seat tam zawkah chuh an tum. Election strategist Prashant Kishore kaihhruai team member-te chuan state chhunga party hma lak chhoh dan turte zirchiangin Shillong pawh an lo tlawh tawh a ni.