Tripura BJP MLA 2-in state sorkar sawisel

Tripura-a politics kaihhnawiha buaina leh tharum thawhna thleng fo chungchangah, rorellai BJP MLA pahnihte chuan chief minister Biplab Kumar Deb kaihhruai sorkar chu sawiselin, an party leh prime minister Narendra Modi hming a chhiat phah niin an sawi.

BJP MLA pahnih - Sudip Roy Burman leh Asish Saha-te chuan Agartala-a press conference an neihah, an state chhunga buaina thleng ṭhin chungchangah Supreme Court, Tripura High Court leh union home minister Amit Shah-te an inrawlh a ṭul a ni, an ti.

Tripura-ah hian nimin khan civil body inthlan neih a ni a, inthlan campaign laiin party hrang hrang worker-te inkarah buaina a chhuak fo a, a bikin BJP leh Trinamool Congress (TMC)-te an buai ngun hle. TMC hruaitu leh worker-te pawhin man an tawk fo a ni.

State sorkar sawiseltu BJP MLA zinga pakhat Burman hi party duh lo zawnga thiltiah puh a nih avangin cabinet minister aṭangin ban a lo ni tawh a ni. Burman chuan state chhunga tharum thawhna thleng fo chuan party hming a tichhiat avangin BJP national president JP Nadda, national general secretary (Organisation) B. L. Santhosh, leh Assam chief minister Himanta Biswa Sarma hnenah pawh an thlen tawh tih a sawi. Chief minister Biplab Kumar Deb chu buaina thleng ṭhin chungchangah mawhphurtuah an puh thu a sawi bawk a ni.