Covid-19 test ti tam turin hmarchhak state 5 hrilh

Union health and family welfare ministry chuan hmarchhak state panga - Nagaland, Sikkim, Manipur, Meghalaya leh Mizoram-te chu Covid-19 hri darh zel tur venna atan test tam zawk ti turin Nilaini khan a hrilh.

Heng state pangaa health secretary-te hnena lehkha a thawnah, union health and family welfare secretary Rajesh Bhushan chuan tunhnaiah zin veivak an pun chhoh vang te, inneih lawmna leh puipunnate a awm chhoh avangin test tam zawk neih a ngai tih a hrilh. "Test tihtlem a nih chuan hri darh dan tak hi a hriat chian theih loh a ni. Thlasik boruak inṭan leh, state ṭhenkhatah pollution a zual avangin test-te hi neih fo a ngai a, hri kaite pawh a rang thei anga hriat chhuah vat zel a ngai a ni," a ti.

Ministry data-in a tarlan danin, Covid vanga thi ratio chu hmarchhak state pathum - Nagaland (2.17%), Meghalaya (1.74%) leh Manipur (1.57%) -ah ram pum huap aiin a sang tih a sawi. India ram pum huap chuan Covid thihpui hi 1.35% a ni. Mizoram chu India ram pumah hri kai mek, active ratio sanna ber niin 3.36% a ni mek a, hetih lai hian Covid thihpui tlemna ber state niin thihpui hi 0.36% a ni thung.