Ruihhlo man hawntu Nagaland IPS officer thubuai siamsak

Nagaland police-te chuan kum 2018-a brown sugar an man a in lama hawntu senior IPS officer lakah Nilaini khan thubuai an ziak lut.

IPS officer Richard Yamto hian brown sugar kg 6.9 an man chu a chenna inah a hawn a, mahse a hnuah a chenna aṭang bawkin heng ruihhlote hi man leh an ni.

Nilaini khan police-te chuan Kohima-a court of principal sessions judge-ah Indian Penal Code (IPC) section hrang hrang, Narcotic Drugs and Psychotropic Substance (NDPS) Act leh Prevention of Corruption Act hnuaiah Yamto hi thubuai hrang hrang an siamsak.

Police-te chuan Nagaland Police Narcotics Cell chuan kum 2018, August 3 khan Manipur leh Nagaland inrina bul, Khuzama-a motor pakhat aṭangin brown sugar hi an man tih an sawi. He motor-a chuang mi pahnihte chu rei vak lo hren an nih hnuah chhuah leh nghal an ni a, thubuai pawh engmah ziah luh a ni lo tih an sawi. Ruihhlo an mante hi hetih laia IGP (CID) Richard Yimto hian a chenna inah a hawn zui a ni.

He thil thleng vang hian IPS officer lakah hian thubuai ziah luh a ni. Thu an zawhfiahnaah Yimto chuan ruihhlote hi a him zawk nan in lamah a hawn niin a sawi. Ni 90 chhunga charge sheet siamsak a nih loh avangin Yimto hian court-ah thlenin, a hna pawh a thawh chhunzawm leh nghal a ni. Tunah hian IGP (Village Guards)-in a awm mek a ni.