Assam-ah mihring hmanga sumdawnnaa hman tur Rawlthar 12 chhanchhuak

Lower Assam-a Bar­peta-ah rawlthar 12, Nepal-a mihring hmanga sumdawnna atana hman tur chhuanchhuah an ni.

Heng rawlthar te hi school kal tawh lo vek an ni a, Nepal-a construction industry-a thawk tura hruai an nih thu tarlan a ni a, kum 14-17 inkar an ni hlawm.

Rawltharte sumdawn­na atana hman tumna thubuaiah hian Barpeta district mi pathum, Siddik Ali, Amir Ali leh Atikur Rahman te chu man an ni a, thingtlang khaw hrang hrang aṭanga hnathawk tur vaia sumdawnna atana hmang ṭhina puh an ni.

Naupang hralh tur zinga pakhat laina hnai hnen aṭanga an thudawn bawhzuiin, Childline Barpeta chuan Barpeta Road town-ah Pathianni tlai dar 4:30 velah khan lirthei pakhat, labour 30 vel phur chu an lo dang a, heng an mi phurh te hi Sililguri aṭanga tlai dar 5 bus nang hmana Nepal-a thawn tur an nih thu report chuan a tarlang. Heng an labour phurh zinga 12 chu kum 18 hnuailam an ni tih tarlan a ni bawk.

Childline Barpeta co-ordinator Rafiqul Islam chuan Thawhṭanni khan heng naupangte hi ramdangah mi pathumin hruai an tum thu sawiin,a hruai tumtute hi hnathawk tur supply tur pawha phalna nei lo an nih thu a sawi. Islam chuan naupang, kum 14-18 chu industry-a hnathawk tura chhawr an nih theih lo thu sawiin, hnawthawk tur supply tu leh labour-te chuan Nepal-a hna an thawh chuan nikhatah 300 an hlawh dawn tih police hnenah an report tih a sawi bawk a ni. Naupang zawng zawng chu Barpeta Road police kutah an hlan thu leh thubuai an ziahluh tawh thu a sawi.

Child Labour (Prohibition and Regulation) Amendment Act, 2016 chuan naupang kum 14 chin hnuai lam chu hnathawka chhawr a phal lo a, kum 14-17 inkar chu industry-ah chhawr a phal lo bawk.

Railway police-te chuan ku­in chhungin Kamrup district-a Rangiya station aṭangin Nepal-a hruai tur naupang 80 vel an chhanchhuak tawh a ni.