India rama state bal pathumna Nagaland Tripura a bal ber

Swachh Survekshan 2018 report in a tarlan dan chuan Nagaland state chu India rama state bawlhhlawh ber pathumna a ni a, Puducherry (Union Territory) chu pahnihna niin, Tripura chu state bawlhhlawh ber a ni.

Sorkar laipui hnuaia Ministry of Housing and Urban Affairs in clean­liness survey a neihah Nagaland chu a tawp pathumnaah a awm a, Tripura chu a tawp berah a awm thung.

Hmarchhak bikah chuan Tripura chu state bal ber an ni a, Nagaland hian a dawt a ni.

Swachh Survekshan 2018 survey in a tum ber chu faina kawnga ramchhung hmun hrang hrang dinhmun hriatchian a ni a, January 2017 aṭanga December 2017 chhung khan Urban Local Bodies rangking siam a ni a, mipui awm dan a zira neih niin mi nuai khat chin leh a aia tam (National ranking) leh mi nuai khat aia tlem awmna (zonal ranking) a ṭhenhran a ni.

Hmarchhaka khaw fai bera thlan chu Mani­pur-a Kakching a ni a, Mizoram-a Biate chuan a dawt a ni. Sikkim chu hmarchhak state fai bera thlan a ni a, India ramah erawh parukna a ni thung. Hmarchhak bikah chuan Manipur in a dawt a, Mizoram chu pathumna a ni bawk.

Rampumah chuan Madhya Pradesh-a sumdawnna hmunpui Indore chu khawpui fai bera thlan a ni a, Bhopal leh Chandigarh in an dawt a ni. Hetih lai hian a state ang chuan Jharkhand chu fai bera thlan a ni thung a, Maharashtra leh Chhattisdarh in a dawt ve thung a ni.