Manipur hel pali Assam-ah thiam loh chantir
National Investigation Agency (NIA) Special court chuan Thawhṭanni khan Guwahati-ah Manipur hel pawl mi pali chu indona chawhchhuah tuma puh an nihnaah thiam loh an chantir.
Manipur hel pawl, People’s Revolutionary Party of Kangleipak arm wing United People’s Party of Kangleipak hruaitu lu pahnih leh an sipai senior pahnih-te chu NIA special court hian Thawhṭanni khan thiam loh a chantir a, Nimin khan hremna pek an nih dan tur puan rin a ni.
An mi man te lakah hian December 2012 khan NIA chuan case a ziak lut a, IPC bakah Unlawful Activities (Prevention) Act hnuaiah an lakah hian thubuai hrang hrang an ziak lut.
Thiam loh chantir zinga hruaitu pahnih te hi Ningthoujam Shanti Meitei (general secretary) leh Langpoklakpam Inaocha Singh (finance secretary) an ni a, midang pahnih hi Laishram Jiten Singh (captain) leh Elangbam Bobo (major) te an ni bawk.
NIA chuan heng mi pali te hi ralthuam kawltuah te, hel pawla tel tura midang te la tu leh train tu an nih bakah 'independent Manipur' siamnna tura helna chawkchhuak tu zingah an tel tih a chhuichhuak a ni.
NIA chuan dik lo taka sum thawkchhuak tu an nih thu sawiin sorkar official sum te pawh an laksak ṭhin tih an sawi a, sumdawng mite leh civil mite pawisa pawh an laksak ṭhin tih an sawi bawk. 2010 leh 2012 inkar khan document siamchawp hmangin bank account hrang hrang an siam ṭhin tih sawiin ramchhung mai bakah rampawnah pawh account hi an siam tih an sawi bawk.