ANVC ‘Garoland’ Map KSU in pawm lo

Khasi Students’ Union (KSU) chuan Achik National Volunteer Council (ANVC) in 2006-a Garo­land Map an tihchhuah chu an pawm theih loh thu sawiin, Khais district hrang hranga hmun ṭhen­khat rinluh tel a nih thu an sawi.

KSU chuan South West Khasi Hills, West Khasi Hills leh Ri-Bhoi area ṭhenkhat chu Garo Hills State Movement Committee (GHSMC) in Greater Garoland, ANVC map zulzuia a pawmah chuan an tel tih sawiin an pawm loh thu an sawi a ni.

District pathuma KSU hruai­tute chuan GHSMC in Greater Garoland an ngiat chu an zah thu sawiin an district area ṭhenkhat an telh erawh an duh loh tih an sawi.

KSU South West Khasi Hills district president, Forward Nong­rem chuan ANCV map-a an district chhunga hmun ṭhenkhat Borsora, Nongjri leh Nonghyllam an rin tel chu an pawm loh thu a sawi a ni.

Ranikor bial KSU hruaitu Marconi Thongni pawhin ANVC map 2006 chu an pawm dawn loh thu a sawi ve bawk.

KSU West Khasi Hills presi­dent, John Nongsiang, pawhin an district chhunga hmun ṭhen­khat Aradonga, Riangdo leh Maw­shynrut-te chu Greater Garoland-ah rinluh tel a nih thu sawiin dodal tura an inpeih reng thu a sawi.

Ri-Bhoi district KSU presi­dent, Ferdinand Kharkamni pawhin Greater Garoland GHSMC in an ngiat chu an thlawp thu leh an zah thu a sawi a, mahse Ri-Bhoi ram inches khat pawh a nghawng tur a ni lo, a ti.