Tripura: Mipui thinrimin mi pakhat sawisa hlum ; Inbiakpawhna titawp lailawk

Tun thlatir mai lama Assam-a mi pahnih, naupang rukbo tum emaw tih vanga Karbi Anglong mipui thinrimin an sawisak hlum thu khan rampum a dengchhuak a nih kha. Thla pawh a la liam em lo tihah Ningani chawhni khan Tripura-a Murabari TSR camp bulah naupang rubo ṭhin emaw tih vang bawkin mipui thinrimin mi pakhat an sawisa hlum leh a, midang pahnihin hliam an tuar bawk.

He thu ziah lai hian thil thlen dan kimchang hriat ni lo mah se, social media lamah mipa naupang kum 1i mi ruang chhar a nih thu leh hlaah thu dik lo leng vak a tam hle a, inkung­kaihna a nei em tih erawh hriat a la ni lo thung.

Mipui thinrimin an sawisak te hian an himna zawngin TSR camp-ah hian luh an tum a, mahse mipui thinrim hi thunun theih an nih loh avangin an pawngchil ta a ni. Hemi avang hian Uttar Pradesh mi Jahir Khan chuan a nunna a chan phah a, Kurshid Khan (Bihar) leh Swapan Mia (Agartala) te chuan hliam nasa tak an tuar bawk. Anni bakah hian TSR official pahnih pawhin chhan an tumna lamah hliam an tuar bawk nia tarlan a ni.

Sedhai Police Station offi­cial-te chuan pawikhawihna thlenna hmunah hian seior official zawng zawng bakah IG pawh an thlen nghal thu an sawi a, thu thang dik lo vanga thleng nia a lan thu sawi. Thuchiang erawh an la tarlang lo.

Hetiang thil a thlen mai bakah hian Naupang ruang chhar chungchangah thuthang dik lo a tam avangin state chhung­ah SMS leh mobile internet tihtawp lailawk a ni.

Thudik lo leng vak a tam
Thawhlehni zana mipa nau­pang kum 11 mi ruang chhar a nih chungchangah hian state chhungah thuthang dik lo a darh nasa hle nia tarlan a ni.

He naupang hi a kal pahnih ruk bo a nih thu a darh nasa hle a, social media lamah naupang ruk bo ching state chhungah an inlar tih a darh nasa hle bawk. Social media lamah nasa taka thu a darh avang hian police-te pawh boruak thunun tura tirh­chhuah an ni hial a ni. Police thu­chhuah chuan thu dik lo theh­darhtute chu na taka hrem an nih tur thu an tichhuak nghal bawk.

Naupang ruang hi postmor­tem a nih hnuah a taksa peng chu a kim vek tih hmuhchhuah a ni a, mahse hemi avang hian boruak thunun theih a nih loh bakah, mipui thinrimin mi pakhat an sawisak hlum thuin state pum a tuam leh bawk avangi thu dik lo darh zel tur ven nan inbiakpawhna hi tihtawp lai lawk a ni.