Tripura civil body inthlanah vote 75.86% a tla

Tripura-a Agartala Municipal Corporation (AMC) leh Urban Local bodies (ULBs) inthlan, November 25-a neihah vote 78.86% a tla a, inthlan result hi November 28 hian puan a ni ang.

Rorellai BJP chuan inthlan hi boruak muanawm tak hnuaiah neih a ni tih a sawi laiin, eptu party CPIM leh Trinamool Congres chuan election commission, returning officer leh police official-te inthlan an kalpui dan chu lungawi thlak loh hle tih an sawi a, vote thlak ṭhat an phut.

Agartala-a press conference a neihah, Left Front convenor Narayan Kar chuan state election commission chuan inthlan felfai takin a buatsaih thei lo niin a sawi. "SEC chuan rorellai BJP duh dan angin an awm a, felfai taka inthlan buatsaih a nih theih loh chungchangah hian DGP chu a mawhphurtu a ni. Police tlem azawng tih loh, a tam ber chuan inthlan chhung zawngin an tih tur ang an ti lo a ni," a ti.

State chhung hmun hrang hrangah Left leader leh worker-te chuan beih an tawk a, an party worker 40 velin hliam tuarin an zinga ṭhenkhat chu an ngaihtuahawm hle niin a sawi bawk. BJP worker-te chuan Agartala, Belonia, Dharmanagar, Khowai leh Melaghar urban local body-a polling station-te chu an luah tlat niin a puh.

Trinamool Congress convener Subal Bhowmik pawhin AMC-a TMC candidate 15 zingah 10-te chuan vote pawh an thlak ve thei lo niin a sawi. "He inthlan buatsaih a nih dan hi kan pawm lo a, Agartala Municipal Corporation-a inthlan ṭhat a nih theihna turin Supreme Court chu inrawlh turin kan ngen dawn a ni," a ti.

Hetih lai hian eptute puhna hi phain, BJP thupuangtu Nabendu Bhattacharya chuan boruak ṭha tak hnuaia inthlan hi neih a nih thu a sawi thung.

BJP hi urban local body 19-a seat 334 awm zinga seat 112-ah chuhtu awm loin an lo tling sa tawh a ni. Ningani hian inthlan hi AMC seat 51, Municipal Council pasariha seat 171 leh Ngar Panchayat parukah neih a ni a, candidate 785 an awm a ni.