Shillong-ah Cherry Blossom Festival hawng

Meghalaya chief minister Conrad K Sangma chuan Ningani khan Japan ambassador Satoshi Suzuki nen Shillong-a Wards Lake-ah Cherry Blossom Festival 2021 an hawng.

Chief Minister Sangma chuan kuminah Cherry Blossom Festival huaihawt a ni thei chu a hlim hle tih sawiin, sorkar chuan kumtina buatsaih a, huam zau zawka music, art leh culture chawilarna tura buatsaih chhoh zel a tum tih a sawi. Nikum khan Covid-19 hripui leng vangin festival hi an buatsaih thei lo a ni.

Ni thum awh tur Cherry Blossom Festival neih rual hian a ṭum khatna atan Shillong Literary Festival pawh hawn tel nghal a ni bawk.

Festival chhung hian competition hrang hrang buatsaih a ni dawn a, heng zingah lam leh zai intihsiak te a tel dawn a, fashion show te buatsaihin, local wine-making bakah Japan leh Korean food-te pawh siam a ni ang.

Japan ambassador Suzuki pawhin thu sawiin, Cherry Blossom Festival chu India ram chhungah chauh ni lo, Japan leh India mipuite tan pawh inpawhna ṭha tak a siam chhoh ngei a beisei thu a sawi. "Ram pahnihten programme hrang hrang an siam tawn hmangin inzawmna ṭha zawk an siam thei dawn a, Japan chuan hmarchhak nena inzawmna ṭha tak a neih te hi a chhuang hle a ni," a ti.